各位會唔會成日將「對唔住」或者「Sorry」掛係嘴邊？其實都無做錯事，但總係下意識講對唔住，連撞到燈柱都同燈柱講對唔住，到底係口頭禪定太有禮貌?
/對唔住，我傷害咗自己既自尊心/
過度道歉有可能係口頭禪或者場面說話，脫口而出既「對唔住」；又或者可能自我否定、自我貶低既情感太強烈，因此習慣同其他人道歉。
前者係一種習慣或從小到大既訓練，但可以嘗試降低講對唔住既頻率，為一啲小事過度道歉，好容易營造出疏離感，可能令其他人覺得無所適從；而後者反映出自尊心偏低，過度想要迎合同討好其他人。係生活當中唔單止過度道歉，更可能會不自覺講一啲負面說話貶低自己，例如 : 嫌棄自己好蠢無用，或者睇低自己能力，覺得自己做唔到等。
其實自我貶低太強既人內心會好攰，仲有可能患上抑鬱症等心理疾病。所以維持適當既自尊心，係保持心靈平衡既必要因素。
/多累積Ach體驗，對得住自己/
自我貶低太強既人，最好多啲累積「Ach體驗」去培養自尊心。Ach係德文，當人得到想要東西或者受到認可時會發出Ach既歡呼聲。而「Ach體驗」即係成功體驗，指達到挑戰既成就感、充實感，受到認同時既快樂心情。
我地唔需要一下子就進行困難級挑戰，先執行一啲生活小目標都得，例如 : 每日早起半小時煮早餐等，慢慢累積成就感，產生自信同埋幹勁。一次成功體驗會帶嚟下一個成功體驗，培養我地既自尊心。