/世界缺少一點讚美/
唔知由幾時開始，我地都習慣對其他人有好高既要求，包括我地既屋企人、伴侶、朋友、甚至陌生人。我地好習慣對別人都係充滿批評，同人相處既時候我地總會搵到人地唔好既野或者缺點。甚至連對自己都係苛刻，好多時候都係講改善既地方，而忘記咗睇自己或者其他人好既一面。
/小時候我學會的是如何做得更好/
唔知大家細個有無試過考試，即使自己覺得成績唔錯，但有時候我地收到既回應係下次點樣可以做得更好，個情況就好似我默書考到97分，屋企人可能第一時間會問點解無拎埋果3分，或者邊到出錯。所以由細開始，得到正面既讚賞都變咗一件唔容易既事。
/比馬龍效應：一句稱讚讓世界變得更美好/
其實我地對其他人稱讚或者慰勞會有一個正面效果。因為當我地去讚賞對方既努力同抱有期望，而對方得到肯定後再產生幹勁去做被讚賞既事情，依個可以稱為「比馬龍效應」。例如當你稱讚朋友跳舞有進步、好好睇，而你既稱讚同期待會令朋友更有動力去練習，去跳好隻舞，務求回應你既期待。
所以由今日開始，我地都可以嘗試減少批評，學識稱讚一下身邊既人，讓世界多一點讚美。