前排搶購物資潮，我屋企人都搶埋一份，搞到而家積壓左幾箱公仔麵同罐頭，食到2046都唔知食唔食得曬。我都同佢地講過好多資訊都未經證實，唔好人搶你又搶。呢頭未講完，果頭又話要買多幾十盒快速測試，話要每日都驗一驗先穩陣，搞到我真係好大壓力。
當我地不斷接收來自四方八面既資訊，難免會引起我地擔心同焦慮既情緒，我地點樣面對呢?
1. 別怪她
其實每日都面對網絡上時真時假既資訊，都會愈睇愈心慌，好容易會出於焦慮同驚慌，而做出一啲未必合理既行動，其實心理上都只係希望增加自己對事件既掌控性。以搶購物資為例，好多人咁做都想未雨綢繆，想避免限制外出下，缺乏物資既情況，加上假消息散播、羊群心理影響。混亂中，除了要盡量認清事實外，亦要但都唔好責怪對方，互相諒解，互相提醒唔好買過多火、囤積大量物資；因可能會造成浪費，以及令物價上漲，恐慌情况只會更惡化。
2. 留一天與你喘息
如果睇太多疫情新聞同資訊而引起好多負面情緒，焦慮、憤怒、激動，應該暫時停一停，俾自己遠離呢啲資訊，每日最多睇1至2次；也可以將社交媒體通知轉至靜音，唔洗即時查看信息，留俾自己喘息既空間。
3. 陪著你走
身邊既家人朋友可能都有好多負面情緒想發洩，有人會大罵一場、有人會不斷放負，只要唔傷害到其他人，呢啲都係釋放情緒方法之一。不過係聆聽對方傾訴既時侯，儘量唔好否定對方既情緒，唔好令佢覺得有負面情緒係錯誤，而係要認知同接納呢種情緒，給予支持同陪伴，互相有同行既感覺，相對減低害怕同無力感。