Angel：「如果我話想分手，喺咪好自私呀？」
嗰陣Angel打嚟問我嘅時候，我都嚇咗一嚇，唔知道佢發生咗咩事令佢會咁樣問。
傾傾吓先發現，讀緊U嘅Angel最近因為出實習同返part time嘅事同男朋友嘈交，令到佢覺得唔知點算。
「我知我自從出實習同返工開始我地好少見面，一個星期可能先見得一次。可以嘅話，我都盡量完咗實習去搵佢，但屋企人又唔鐘意我去搵佢，覺得我點解要倒貼比人，我好辛苦⋯好似做咩都唔啱⋯」Angel喊住咁講。
Angel喺個好體貼，好重視關係嘅女仔，言談間，我感受到佢不斷想令男朋友開心，想屋企人放心。但亦都因為佢嘅體貼，佢好少諗自己，我問佢：「咁你呢？你自己點諗？」佢停咗一陣，之後話：「如果我話想分手，喺咪好自私呀？」
Angel覺得出實習、返part time佔咗生活大部分時間，呢啲對佢嚟講好重要，都想身邊嘅伴侶明白同體諒自己，但無奈大家喺見面時間上讓唔到步。無數次爭吵令Angel覺得好攰，雖然好想繼續同對方一齊，亦唔想因為自己⋯而傷害佢。
感情本來就喺自私？我諗可以留待大家去思考，而喺Angel嘅感情生活入面我見到嘅喺大家都有各自生命中重視嘅部分，但相處嘅時候難以平衡，所以發生衝突。每個人喺每個階段都有自己重視嘅野，本來就喺最正常不過嘅事，亦無話重視發展多於重視關係就喺錯。人與人之間相處，總要磨合、要諒解，當去到難以挽回嘅地步，或者正正話你知，自己而家真正需要嘅係啲咩，有時分開亦都唔一定喺壞事。