你有無試過聽到幾個同學圍埋細聲講大聲笑，就懷疑佢地嘲笑緊自己 ? 或者疑心好重，經常懷疑朋友或者伴侶背叛自己 ? 覺得呢個世界無人信得過，接近自己嘅人都可能帶有目的，所以對人都十分之有警惕性同敵意。以上嘅行為形容都可能有「偏執型人格」嘅傾向。
/偏執型人格障礙嘅特徵/
偏執型？咪即喺好執著？其實極端嘅偏執型就會形成「偏執型人格障礙」(Paranoid Personality Disorder)，有「人格障礙」嘅意思即係性格會變得極端，威脅到自己嘅日常生活同人際關係。而偏執型人格障礙最典型嘅特徵包括普遍對其他人都唔信任同猜疑，將其他人嘅行為動機揣測成惡意。
根據《精神疾病診斷與統計手冊》第五版 (DSM-5)，符合以下4點或以上嘅特徵，係成年早期出現，會初步診斷為「偏執型人格障礙」：
🔹無證據地懷疑其他人剝削、傷害或欺騙自己。
🔹無證據地懷疑朋友或同事既忠誠。
🔹好難信任其他人，莫名地害怕透露自己嘅訊息會被對付。
🔹將善意嘅說話視為對自己隱含嘅貶低或威脅。
🔹唔會原諒其他人嘅傷害，長期心懷怨懟。
🔹察覺出其他人睇唔出對佢名聲嘅攻擊，迅速行動同反擊。
🔹無證據地反覆懷疑伴侶忠貞。
/關閉内心信任嘅大門／
其實偏執型人格傾向，佢哋内心好多時候都會有恐懼同羞愧，但另一方面會覺得呢啲情感只會令自己脆弱。為咗抵擋呢啲感受，就會啟動出「分裂」(splitting)同「投射」(projection)嘅防禦機制，眼光非黑即白，將内在嘅「壞我」部分投射到其他人身上，於是佢哋就認為世界其他人都喺壞人，唯有自己先喺好人。
有一啲研究指出，偏執型人格形成可能同強勢及羞辱嘅教養方式有關。長期嘅極度嚴厲批評，侮辱直接訓斥，令到人成年後都以童年創傷經歷作為認知世界嘅唯一方式。由於未曾得到愛，都無法相信愛，早已關閉内心信任嘅大門。
/我會唔會都係偏執之人？/
有傾向唔代表有人格障礙，又唔需要過分擔心，唔同人面對事情都會有唔同嘅情緒反應，只要早啲認識自己、理解自己，學習面對自己性格上嘅不足，取得性格上嘅平衡。
如果你覺得自己或者身邊有朋友出現以上呢啲情況，感到好困擾或者唔知點算，歡迎打27778899或者inbox搵我哋傾訴，一齊同你面對困難。