呢排又到咗畢業嘅季節，啱啱大學畢業嘅我，諗返起中學畢業，都有同一種感覺—迷惘！「迷惘」，應該足以形容我人生大部分嘅心情。唔知揀呢條路適唔適合我？我做呢樣野又好似無人哋咁叻喎？做耐咗呢樣野又好似覺得厭悶，我會唔會其實無興趣呢？
好多好多嘅考慮，令我經常轉換興趣、目標，學咩玩咩都係半桶水，三分鐘熱度。由鐘意唱歌跳舞，之後走去畫畫讀art，想做時裝設計師；突然又想做獸醫，走去做咗一日獸醫助理；跟住又想學吓彈吉他，學吓沖咖啡，仲幻想要開間文青味濃嘅咖啡店；而家又諗不如疫情過後做航空業，可以周圍飛。諗咗咁耐，我覺得自己好似無一個特別有熱情嘅興趣、想堅持嘅方向，無乜偉大嘅成就想實踐，我嘅人生目標就係不斷搵人生目標。
就好似《靈魂奇遇記》入面嘅22號，搵極都搵唔到個「火花」，我會唔會就喺嗰啲迷惘嘅巨獸？但22號同呀祖嘅經歷令我發現，人生唔只喺單一嘅指標同期待，「火花」可以喺目標成就，都可以喺感覺感受。擁抱生活嘅微小同細節，欣賞自己嘅優缺同價值，唔好俾「過往嘅挫敗」或者「未來嘅目標」捆綁，自在地享受人生嘅每一刻。