如常返學嘅朝早，上第一堂嘅鐘聲響起，我望向課室左邊最後嘅座位，依然喺空蕩蕩，突然有一種好奇怪嘅感覺湧上心頭，但我無諗太多。直到我想喺櫃桶入面拎書時，摸到有一張對摺左嘅紙，拎出嚟一睇，上面寫住：「To ：曾經嘅好朋友」，我嘅心即刻揪住，略帶半分疑惑地凝住呼吸去打開呢張紙。
「其實咁耐以嚟佢地取笑我、恰我，我最嬲嘅都唔喺佢地，我最嬲嘅人其實喺你⋯⋯」呢一句說話將我帶返去呢一年間一幕幕嘅畫面⋯⋯
阿明喺我中一第一日返學最快識到嘅朋友，因為我地坐隔離位，加上阿明嘅熱情，好快我地已經成為咗好好嘅朋友，一齊食lunch、一齊放學、一齊做功課、一齊打機。
直到升上中三，我地可以又同班，本來以為喺一件開心事，但因為我懦弱，破壞咗我地嘅關係，甚至帶俾阿明傷害。唔知咩原因地阿明得罪左班上一位受歡迎嘅同學，嗰位同學開始帶埋啲跟班，甚至全班同學去欺凌阿明。
阿明天生講嘢有少少口吃，班上嘅同學一聽到佢講嘢就會取笑佢。「頭先個口吃明，答條咁簡單嘅問題用咗成三分鐘，真係阻住地球轉，哈哈哈！」小息嘅時候，經常帶頭欺凌呀明嘅同學係班上大大聲同全班講，引起其他同學起哄，有人附和、有人陪笑、有人視若無睹，而我就喺其中一個沉默嘅大多數。我感受到阿明嘅目光向住我，佢想同我講嘢，我知佢想我陪佢行出呢個班房，但我只喺低住頭扮寫野，唔敢喺大家面前同阿明有任何交流，因為我唔想成為下一個被欺凌嘅對象。
慢慢地，我會有意無意去避開阿明，食lunch會約其他同學、放學我會話有事行先。可能佢都意識到我對佢嘅迴避，佢都唔再主動搵我講嘢，我哋嘅關係越嚟越疏離。
有一日，做值日生嘅阿明如常地擦黑板，突然飛出幾枝紅色粉筆去佢背後，打中阿明條校服褲，呀明略為嚇驚之下執起粉筆，然後目無表情地返去座位。飛出粉筆嘅同學大聲同阿明講 :「你流血喎，洗唔洗帶你去醫療室呀？」又一次引起班上同學哄堂大笑。當我見到阿明望住我通紅嘅雙眼，我意識到自己為咗融入群體、從眾嘅心態，嘴角配合地向上揚，喺呢刻我知道為時已晚，我從頭到尾都做錯咗。
「⋯⋯我好開心、都好多謝你曾經做咗我兩年嘅好朋友，我希望去到新嘅學校可以有返少少嘅幸運，平平靜靜咁過剩低嘅中學生活。 阿明」
欺凌者固之然可恨，但原來我嘅沉默不亞於欺凌者嘅直接傷害，甚至會助長欺凌發生。
同學有無遇過類似以上經歷？留言或者inbox話俾我地知。