/你以為的善良，或者只是懦弱/
你有無試過經歷以下嘅情境？
同學叫你一齊夾生日禮物俾一位自己唔熟嘅朋友，為咗唔俾人話小氣，默默係銀包撳錢。
做group project時，幫一位最近心情唔好嘅組員做埋佢個part。
出街見到老人家排隊打尖，但見佢喺長者就唔嘈佢。
人地話你好人，抵得諗，拜託你幫忙做事，你二話不說就應承咗。
如果你經常有以上或者類似嘅情況，好有可能反映你嘅善良背後，或者喺你對其他人嘅妥協、盲目跟從。好多時候，我地都好想做一個「好人」，經常以為不斷付出、幫到人，就係做緊好事。但其實過份嘅包容，或者無原則嘅協助，反而喺縱容其他人嘅懶惰、不負責任，間接都扼殺咗其他人成長嘅機會。咁樣嘅熱心，又會唔會真喺對其他人好呢？同時間，過份地委屈自己，亦會令自己變得無主見，唔敢表達自己內心嘅睇法。咁樣落去，對人對己，似乎都唔喺一件好事。
/善良都要有原則，拒絕成為爛好人/
善良亦要有界線，當其他人嘅請求符合自己嘅標準，又喺能力範圍之內，當然可以伸出援手；否則，應該堅定地拒絕，咁樣做，既可以令人知道你嘅原則，亦可避免你因為做唔到承諾而苦惱。
/學會說不，維護及尊重自己真實的看法/
直接坦率地拒絕喺需要勇氣，一開始可能會唔慣，亦有可能招來白眼，但只要清楚自己嘅原則，態度堅定，遲早都會有人明白你，尊重你。學會尊重自己真實嘅感覺，以行動說「不」，做一個讓自己快樂，亦讓其他人欣賞嘅好人吧！