小蔡今年23歲，喺一間名牌西裝店做銷售員，返工令佢覺得心身都特別攰，呢一個月一直都追唔到銷售額。企咗八個鐘終於放工嘅小蔡，呢一刻好想搵朋友陪伴，拎起電話諗住打俾朋友時，全部都轉駁到去留言信箱。於是佢打開Group chat打左一句﹕「今晚有無人得閒?」，小蔡孤單感覺油然而生。
小蔡戴起Airpod，播放鄭秀文嘅《我們都是這樣長大的》。
「兒童有著兒童畏懼 成人都有成人唏噓⋯⋯」
腦海浮現出從前嘅一幕幕：仲喺牙牙學語時，學揸筷子、學行路，屋企人都會拖住小手，逐步逐步陪住佢去實踐；純真無畏嘅日子，玩跳大繩、小食部買零食，總會同同學聯群結隊一齊去；最青春嘅歲月，行街打波、講心事，都會叫上最好嘅兄弟；最有幹勁嘅大學階段，通宵上莊、為知識海奮鬥，志同道合嘅同伴總會喺小蔡身邊互相打氣⋯⋯其他人唔會陪伴我哋一世，但曾經純真嘅回憶喺確實存在。
「時而走近時而遠去 誰散與聚 都居於心裡⋯⋯」
坦白咁講 ─ 我們都是這樣長大的。
由細到大都渴望有人喺自己身邊，想被聆聽、被重視、被理解同被肯定。我們不知不覺咁長大，卻無意識到呢一切，原來因著生命階段變化，好多人、事、物都會唔再一樣。但其實呢啲曾經存在過喺生命中美好嘅回憶，會喺某時某刻，陪伴住我哋。好好珍惜而家擁有嘅一切，感恩擁有過嘅「陪伴」，仲要仲要記得感謝自己一直陪住自己！
唔知你哋有無一啲感覺自己突然成長嘅時刻可以分享呢？孤單時無人陪伴，你會點樣渡過？喺下面留言或者打2777 8899同我哋社工傾下呀！