/女仔一定要着裙化妝？/
我叫Hilary，由細到大，我都唔鍾意着裙，又驚走光，行起路上嚟好唔自在，除咗中學校裙，基本上我係唔會着其他裙。除此之外，化妝我都唔鍾意，我唔喺唔貪靚，只喺覺得化妝容易、落妝難，每次化完妝都要落妝好麻煩，所以如非必要我都唔會特別化妝。
我有好多好close嘅朋友，男仔女仔都有，不過就係未識到男朋友。
屋企人同朋友都成日話 : 你個樣又唔差，得閒着下裙化下妝啦，一定好多男仔追架！
有時我都會諗 :「唔通我應該要再女仔啲？」
/性別角色定型/
「性別角色定型」喺指以性別去定型一個人嘅志趣同性格，所以如果將對兩性固有睇法去定型一個人，會同時抹殺個人差異同特質。例如 : 男仔應該剛強、勇敢、唔鍾意打扮、以事業為主、關係上亦會被期待經濟付出多啲 ; 而女仔就應該斯文賢淑、被保護、貪靚愛打扮、關係上被期待作為照顧嘅一方。
男女行為表現不同，除咗先天因素之外，更加多喺社會將傳統文化觀念或父母等嘅教導加諸身上。事實上，男性化或女性化係兩個獨立嘅特質，無論男性或女性都可以同時兼具兩者嘅性格同特點。例如 : 男仔都可以鍾意打扮，女仔都可以好strong、好堅強。
「雙性化模型」嘅提出者Sandra Bem甚至指出雙性化先係適應良好嘅象徵，喺現今繁瑣複雜嘅社會中，對只具有單一男性化或女性化性別角色嘅人嚟講，比較缺乏適應力同勝任力。
/打破性別角色的邊界/
社會大眾對兩性嘅性別角色有一定嘅期望，但如果只因著呢啲期望而不停推動自己，可能會造成無形同不良嘅壓力。加諸一個人身上嘅既定角色可以限制一個人嘅人生，真正興趣唔會發展，發揮才能嘅機會被抑制，真我性情亦會被隱藏。相反，如果可以從性別角色嘅印象解放，發展會更廣泛，有更大自由度發揮更大嘅潛力，相信成就會更大。
其實社會越嚟越趨向多元化發展，建立性別平等嘅觀念，一啲工作從以往有既定性別定型到依家男女比例越嚟越平均，就好似女機師、男空中服務員、男社工、男護士、女醫生、女工程師等。
從社會規範嘅刻板框架走出嚟，或者你會漸漸發現任何人，無論男人或女人、男性化或女性化、你們或他們，其實都喺作為一個「人」而存在。