邊緣型人格 ? 係咪即係成日講果啲「社交邊緣人」? 其實完全係兩回事。有邊緣型人格嘅人通常容易出現極端行為或者情緒唔穩定嘅狀況。
/我會唔會都係「邊緣人」? /
有邊緣型人格嘅人通常都缺乏安全感，係親密關係上經常都擔心自己被拋棄。如果拍拖嘅時候，相處好就會如膠似漆，但有時又會突然性情大變，指責對方不負責任，懷疑對方背叛自己，甚至以分手作威脅。待情緒過去後，似乎又忘記自己之前發過嘅脾氣，恢復到甜蜜溫柔嘅狀態。而呢啲情況更會反覆發生，令對方感到無所適從。
正如以上描述嘅例子反覆持續出現，有可能係處於「邊緣型狀態（borderline states）」，反映岀有邊緣型人格人士背後嘅核心恐懼 ∶ 佢哋害怕被拋棄，更極力避免任何真實或想像出來被抛棄嘅情況。
根據《精神疾病診斷與統計手冊》第五版（DSM-5），符合以下5點或以上嘅特徵，係成年早期出現，有可能被初步懷疑係「邊緣型人格障礙」(只供參考，需專業人士評估作實)：
🔹極力避免真實或想像出來嘅「被抛棄」。
🔹在人際關係上呈現不穩定、緊張模式，並會表現出操控他人嘅意圖。
🔹身份絮亂，扭曲且不穩定的自我形象（Self-image），進而影響到心情、價值觀、意見、目標和關係維繫。
🔹出現行為衝動或行事不顧後果，如 : 過度消費、藥物濫用、危險駕駛、濫交等。
🔹出現反覆自殘，企圖自殺行為，或以自殺威脅他人。
🔹情感不穩定，易被惹怒或焦慮，通常持續幾小時。
🔹長時間維持慢性空虚感。
🔹不恰當強烈地或難以控制地發怒，通常也帶有羞愧和罪惡感。
🔹或會產生解離感（Dissociative feelings），與壓力有關嘅偏執觀念。
/從情緒懸崖邊沿走回來/
邊緣型人格障礙人士好容易係唔同嘅人際關係中糾纏不息，內心渴望成為其他人「最重要的人」，最好永不分離，甚至不惜採取衝動，甚至對一己危險嘅方式去維持呢種「關係」。
不過，很多人可能未到達人格障礙嘅程度，可以考慮通過以下方式嚟調節自身性格中嘅邊緣型傾向，以及按需要尋求專業人士協助 。
1. 觀察並記錄自己嘅情緒變化
每日都要記低自己有過嘅感受同反應，係充分觀察同了解之後，就可以嘗試預測自己嘅情緒變化，做好準備。
2. 從二元對立嘅思維中走出嚟
邊緣型人格看待事物經常都偏偏極端，一係全好，一係全壞。但可以嘗試練習係每次判斷完之後都問一問自己 :「呢件壞事有無好嘅一面呢?」「我迷戀嘅呢個男人係唔係都有缺點?」當好與壞能夠共存，就係一個轉變嘅契機。
參考資料：倪慢慢（2020）。《圖解微人格心理學：教你發現身體裏另一個自己》。香港：香港中和出版有限公司。