「我想同你講啲嘢。」
「咩啊？」
「我屋企人話我地要移民去英國。」
呢幾句說話一嘢轟落嚟，我真喺比唔到反應。
「幾時啊？」
「11月尾。」
雖然我地有討論過將來嘅問題，但自己之後嘅升學路喺點都未知，更加唔敢諗更遠嘅將來。不過就算有幾多變數，困難重重，但我地真喺好愛對方，唔想因為遠距離而放棄。我喺一個好長情嘅人，總之我有種感覺就喺想娶阿蔚，可能你會話我傻，但我真喺想同佢結婚生小朋友，成家立室，甚至幻想過同佢一齊抱孫。
如明日便要遠離 願你可以
留下共我曾愉快的憶記
喺阿蔚臨走前，我都想盡量抽時間陪佢。同佢睇戲、打機、打波、食飯、溜冰、燒嘢食、打邊爐、影貼紙相……咩都想同佢做盡，做哂一年嘅份量！但其實點樣抽，時間總喺有限。
一眨眼，就到咗阿蔚離開嘅日子。一早就去機場送機，當經過青馬大橋時，我個心揪咗一下，以往經過呢度都係懷住興奮嘅心情，但我今次個心好痛，諗起種種以後嘅「未知」，我同阿蔚嘅「將來」究竟係點？我地又經唔經得過遠距離嘅考驗？阿蔚臨入閘前送咗我一份禮物，要等佢走咗先拆。最後望住佢消失係「離境」嘅身影，啲眼淚都忍唔住不斷滴落嚟。
我好心急想即刻拆咗份禮物…原來阿蔚畫咗本passport同機票，「這天只想帶走，還是你……應承我，考完DSE過嚟搵我！我知道前路好多難關，但我地一定可以逐一跨過！」
嗯！我地一定可以跨過，等我！
#但要走總要飛 #有關離別 #一分鐘故事 #onestory
關心一線：27778899
服務時間: 星期一至六 14:00-02:00