一分鐘故事｜ EP.04 但要走 總要飛 (上集)
天氣不似預期 但要走總要飛
道別不可再等你 不管有沒有機
由細到大，我都對機場有特別嘅感覺，每次搭車經過青馬大橋就會好興奮，因為去機場，就等於去旅行。不過，經歷今日之後，一諗起機場就多咗一份傷感……
我同阿蔚喺中三同班同學，阿蔚同一般女仔唔同，佢無長直髮大眼睛，而喺爽朗短髮，佢啲五官好標緻，都幾靚架。我地喺因為鐘意打波所以慢慢熟絡，慢慢互相鍾意，中三升中四嘅暑假我地就正式一齊咗。
同阿蔚一齊真喺好舒服，好自在。雖然佢啲興趣好男仔頭，但佢份人好細心，對我好好，成日會比啲小驚喜我，喺一個好甜蜜既女仔，甚至有時我覺得佢了解我多過我自己。
「喂，你出咗門口未啊？我今日又唔記得帶PE衫啦，上次咪擺咗套係你屋企嘅，可唔可以拎比我啊？」
「出咗啦，我…」
「下，咁唔緊要啦，我再問其他人借。」
「我想話我估到你啦，幫你拎咗啦。」
「Oh! Love you! 陣間見！」
我地嘅故事，就係好日常，好一般嘅校園戀愛。
自從拍拖後，覺得時間過得好快，眨下眼我地就一齊咗兩年，已經要升中六。呢兩年當然都有鬧下交，發下脾氣，不過我真喺好鍾意佢好珍惜佢，所以通常我都會氹返佢先，而佢都好快俾我氹得返。
今年疫情關係，我地由以往返學日日見，到轉咗online lesson見少咗。有日真係好掛住阿蔚，網上補完課後就去佢屋企搵佢，點知嗰日阿蔚帶咗一個我接受唔到嘅消息俾我。
「我想同你講啲嘢。」
「咩啊？」
「我屋企人話我地要移民去英國。」
待續…
無獎問答遊戲︰你地覺得主角同阿蔚嘅結局會係點呢？你地又有冇身邊同學/ 朋友將要離開啦？歡迎Inbox，或者直接打嚟27778899，同我地傾下啦！
————————————————————————
#但要走總要飛 #有關離別 #一分鐘故事 #onestory
關心一線：27778899
服務時間: 星期一至六 14:00-02:00