一分鐘故事｜ EP.02 別用離開教我失去的人最重要
由細到大，我同媽媽一齊住，爸爸係我小一個年離開咗屋企。個時我年紀仲細，唔理解媽媽點解要同爸爸離婚。
每次番學要寫父母職業，爸爸個欄都會空左，同學都會笑我冇爸爸，所以我一直都好憎我媽媽，係佢令我單親。我會諗：你地啲大人好奇怪，你地唔再相愛，咁點解當初要結婚？點解要生我？點解又要離開我？
雖然媽媽一直都好關心我，事無大小都照顧我，但我…
記得有一次，佢幫我整左飯盒，叫我帶番學校。我覺得帶飯好醜怪，而我又想同同學出去食飯，我係媽媽面前一手將啲飯倒左落垃圾筒⋯⋯但媽媽冇怪我，佢偷偷地擦下眼淚，默默咁洗碗，之後我好後悔⋯⋯
突然有一日放學，收到舅舅電話得知媽媽因肺炎入左院。我反應唔到，個次亦都係人生第一次到醫院探訪… 媽媽把聲軟弱無力，媽媽發緊高燒：「呢兩個星期冇人係屋企，俊，自己要照顧好自己阿…」
呢兩個星期，時間過得好慢… 失去左媽媽，我先知道平時佢為呢個屋企付出左咁多。我先發現依加無人幫我洗衫接衫、無人每朝叫我起身、買菜煮飯、提我要早訓，依加咩都要自己做，個刻先感覺到媽媽對我有幾重要。每次到醫院探病，我都好後悔當時對媽媽態度咁差….
呢段時間我明白到，唔係每個人都可以選擇自己既家庭，不斷地被同學取笑單親，呢個成長的確唔好受，甚至有時候會相信個啲聲音係真。但媽媽要獨自養大我，佢比我更辛苦。呢刻，我只係好珍惜一直以黎媽媽比我既關愛下成長，我希望以後可以對佢好啲，照顧番佢。
————————————————————————
#有關失去 #一分鐘故事 #onestory
關心一線：27778899
服務時間: 星期一至六 14:00-02:00